yaqin kaise dilaun ki tujh pe marta hun

yaqīn kaise dilā.ūñ ki tujh pe martā huuñ

tire liye maiñ abhī apnā ḳhuun kartā huuñ

mire makān ne kyoñ mujh ko bāñdh rakkhā hai

isī galī se maiñ har baar kyoñ guzartā huuñ

saḌak pe log khilaunā dikhā.ī dete haiñ

maiñ apne room kī khiḌkī pe jaate Dartā huuñ

vo kaun hai jo mire sāmne nahīñ aatā

maiñ apne aap meñ kis ko talāsh kartā huuñ

zamāna chāñd se aage nikal gayā 'alvī'

magar maiñ barf ke ghar meñ paḌā ThiThurtā huuñ

yaqin kaise dilaun ki tujh pe marta hun

tere liye main abhi apna KHun karta hun

mere makan ne kyon mujh ko bandh rakkha hai

isi gali se main har bar kyon guzarta hun

saDak pe log khilauna dikhai dete hain

main apne room ki khiDki pe jate Darta hun

wo kaun hai jo mere samne nahin aata

main apne aap mein kis ko talash karta hun

zamana chand se aage nikal gaya 'alwi'

magar main barf ke ghar mein paDa ThiThurta hun