ye aankh hai to use aisi ab jila mil jae

ye aañkh hai to use aisī ab jilā mil jaa.e

parat diloñ kī khuleñ dard kā pata mil jaa.e

ye khel bhī ho havas apne haath lambā.e

kahīñ bhī ho vo mirī god meñ paḌā mil jaa.e

girā hī duuñ maiñ abhī haft-rang dīvāreñ

bikhar hī jā.ūñ agar sar-phirī havā mil jaa.e

mile phir aisī zamīñ jiskā or-chhor na ho

phir us zamīñ pe hameñ āsmāñ dharā mil jaa.e

kabhī to baaġh kā paiġhām dasht meñ aa.e

kahīñ to ret pe chaltī huī havā mil jaa.e

guzar hamārā bhī sunsān jangaloñ meñ ho

hameñ bhī aag ke badle kahīñ ḳhudā mil jaa.e

utartā Dūbtā jaatā huuñ chup ke dariyā meñ

kisī kī chīḳh koī duur kī sadā mil jaa.e

ye aankh hai to use aisi ab jila mil jae

parat dilon ki khulen dard ka pata mil jae

ye khel bhi ho hawas apne hath lambae

kahin bhi ho wo meri god mein paDa mil jae

gira hi dun main abhi haft-rang diwaren

bikhar hi jaun agar sar-phiri hawa mil jae

mile phir aisi zamin jiska or-chhor na ho

phir us zamin pe hamein aasman dhara mil jae

kabhi to bagh ka paigham dasht mein aae

kahin to ret pe chalti hui hawa mil jae

guzar hamara bhi sunsan jangalon mein ho

hamein bhi aag ke badle kahin KHuda mil jae

utarta Dubta jata hun chup ke dariya mein

kisi ki chiKH koi dur ki sada mil jae