یہ جانتے ہوئے بھی گزاری ہے زندگی

یہ جانتے ہوئے بھی گزاری ہے زندگی

ہم زندگی کے ہیں نہ ہماری ہے زندگی

دریافت ہو رہے ہیں ستارے نئے نئے

شاید یہی ستارہ شماری ہے زندگی

ہم کوئی زندگی کے لئے نا گزیر ہیں

یہ بات بھی بہت ہے کہ جاری ہے زندگی

آسائشوں کا نام نہیں زندگی مگر

آسائشیں بہم ہوں تو پیاری ہے زندگی

رکتی نہیں بڑے سے بڑے انقلاب پر

وقتی تأثرات سے عاری ہے زندگی

بہتی ہوئی ندی پہ کسے اختیار ہے

میری ہے زندگی نہ تمہاری ہے زندگی

علم و ہنر کی قدر بھی ہوتی تو ہے شعورؔ

پیسہ نہ ہو تو ذلت و خواری ہے زندگی