ye mat samjho haqiqat se kinara karne wala hun

ye mat samjho haqīqat se kināra karne vaalā huuñ

maiñ sab ḳhvāboñ ko apne paara paara karne vaalā huuñ

jise maiñ ne kabhī aadhā adhūrā kar ke chhoḌā thā

vo kaam ab ke ba-tarz-e-nau dubāra karne vaalā huuñ

kiyā thā kal musaḳhḳhar bas zarā sā hī jise maiñ ne

use apnā maiñ ab saare kā saarā karne vaalā huuñ

milī fursat to phir is ko kabhī sūraj meñ Dhālūñgā

abhī to is sharar ko maiñ sitāra karne vaalā huuñ

jise dekho yahāñ auroñ ke nuqsāñ kā hī bā'is hai

bas ik meñ huuñ jo aap apnā ḳhasāra karne vaalā huuñ

jahāñ vaalo mirī in an-khulī āñkhoñ pe mat jaao

maiñ band āñkhoñ se duniyā kā nazāra karne vaalā huuñ

sun ai fir'aun-e-'ālam maiñ koī muusā nahīñ lekin

maiñ terī saltanat ko paara paara karne vaalā huuñ

zabāñ se kuchh na kahnā husn kī fitrat sahī lekin

ye ḳhāmoshī bhalā kab maiñ gavārā karne vaalā huuñ

agar samjhe to bas ahl-e-nazar samjheñge kuchh 'najmī'

maiñ ġhazloñ meñ bahut nāzuk ishāra karne vaalā huuñ

ye mat samjho haqiqat se kinara karne wala hun

main sab KHwabon ko apne para para karne wala hun

jise main ne kabhi aadha adhura kar ke chhoDa tha

wo kaam ab ke ba-tarz-e-nau dubara karne wala hun

kiya tha kal musaKHKHar bas zara sa hi jise main ne

use apna main ab sare ka sara karne wala hun

mili fursat to phir is ko kabhi suraj mein Dhaalunga

abhi to is sharar ko main sitara karne wala hun

jise dekho yahan auron ke nuqsan ka hi ba'is hai

bas ek mein hun jo aap apna KHasara karne wala hun

jahan walo meri in an-khuli aankhon pe mat jao

main band aankhon se duniya ka nazara karne wala hun

sun ai fir'aun-e-'alam main koi musa nahin lekin

main teri saltanat ko para para karne wala hun

zaban se kuchh na kahna husn ki fitrat sahi lekin

ye KHamoshi bhala kab main gawara karne wala hun

agar samjhe to bas ahl-e-nazar samjhenge kuchh 'najmi'

main ghazlon mein bahut nazuk ishaara karne wala hun