ضبط الم سے دل ہے پریشاں اس دل کو سمجھائے کون

ضبط الم سے دل ہے پریشاں اس دل کو سمجھائے کون

آنکھوں سے آنسو گرتے ہیں خوں ان کو رلوائے کون

چاک ہے دامن چاک گریباں عقل و خرد سب چھوڑ گئے

موسم گل کے ہنگامے کی آخر یاد دلائے کون

ان کا ثبات ہے کتنے دن کا پوچھ لو جا کر پھولوں سے

خندۂ گل یا جشن بہاراں ان سے دھوکا کھائے کون

محفل مے ہے تشنہ لبی ہے پاس ادب تو لازم ہے

مانا کہ اذن عام ہے ساقی بڑھ کے جام اٹھائے کون

دیکھ کے جلوہ خیرہ ہیں آنکھیں ہوش میں آنا مشکل ہے

آپ ہی کہہ دیں حرف تمنا اپنی زباں پر لائے کون

جام و سبو ہیں رقص میں لیکن چپ سی لگی ہے منظرؔ کو

آگے تصور کی دنیا میں دل کی آگ بجھائے کون