zahr ki chuTki hi mil jae barae dard-e-dil

zahr kī chuTkī hī mil jaa.e barā.e dard-e-dil

kuchh na kuchh to chāhiye baabā davā-e-dard-e-dil

raat ko ārām se huuñ maiñ na din ko chain se

haa.e haa.e vahshat-e-dil haa.e haa.e dard-e-dil

dard-e-dil ne to hameñ behāl kar ke rakh diyā

kaash koī aur ġham hotā bajā.e dard-e-dil

us ne ham se ḳhairiyat pūchhī to ham chup ho ga.e

koī lafzoñ meñ bhalā kaise batā.e dard-e-dil

do balā.eñ aaj kal apnī sharīk-e-hāl haiñ

ik balā-e-dard-e-duniyā ik balā-e-dard-e-dil

zindagī meñ har tarah ke log milte haiñ 'shu.ūr'

āshnā-e-dard-e-dil nā-āshnā-e-dard-e-dil

zahr ki chuTki hi mil jae barae dard-e-dil

kuchh na kuchh to chahiye baba dawa-e-dard-e-dil

raat ko aaram se hun main na din ko chain se

hae hae wahshat-e-dil hae hae dard-e-dil

dard-e-dil ne to hamein behaal kar ke rakh diya

kash koi aur gham hota bajae dard-e-dil

us ne hum se KHairiyat puchhi to hum chup ho gae

koi lafzon mein bhala kaise batae dard-e-dil

do balaen aaj kal apni sharik-e-haal hain

ek bala-e-dard-e-duniya ek bala-e-dard-e-dil

zindagi mein har tarah ke log milte hain 'shuur'

aashna-e-dard-e-dil na-ashna-e-dard-e-dil