زمانے بھر میں کسی سے ملا نہیں کرتے

زمانے بھر میں کسی سے ملا نہیں کرتے

ترے سلوک کا ہم تو گلہ نہیں کرتے

مرے خیال کی بستی میں چار سو تم ہو

کبھی بھی خود سے تجھے ہم جدا نہیں کرتے

یہ خوں کے اشک تو دل میں اترتے رہتے ہیں

برون چشم یہ ہرگز گرا نہیں کرتے

دلوں میں جن کے محبت ہو جاگزیں تیری

نماز عشق وہ ہرگز قضا نہیں کرتے

ترے بغیر ادھوری نماز ہوتی ہے

ترے بغیر تو سجدہ ادا نہیں کرتے

تجھی سے مانگتے ہیں اور تجھی سے مانگا ہے

ترے سوا تو کسی کو خدا نہیں کرتے

ندیمؔ دیکھ سنبھل کے تو چل زمانے میں

لہو کے رشتے بھی اب تو وفا نہیں کرتے