زمانے میں کچھ ایسی بھی جفاکاری نہیں ہوتی

زمانے میں کچھ ایسی بھی جفاکاری نہیں ہوتی

تری جانب سے سکھ کی نیند بھی جاری نہیں ہوتی

دم رخصت یہاں اپنی وفا رکھ جانے آئے ہو

بدن میں دل ہوا کرتا ہے الماری نہیں ہوتی

دلوں کے کاٹنے کے واسطے احباب ہوتے ہیں

دلوں کے کاٹنے کے واسطے آری نہیں ہوتی

اگر چاہو تو پھر اپنی سی کوشش کر بھی سکتے ہو

ہمیں معلوم ہے تم سے وفاداری نہیں ہوتی

وفا بوتے ہو آخر کس لیے کم ظرف سینوں میں

کبھی اشفاقؔ گملوں میں شجرکاری نہیں ہوتی