ذہن میں چراغاں ہے روح جگمگائی ہے

ذہن میں چراغاں ہے روح جگمگائی ہے

شام کے دھندلکوں میں یاد تیری آئی ہے

کل خزاں میں دیوانے بے نیاز دامن تھے

فکر پیرہن اب ہے جب بہار آئی ہے

خود الجھ گئے آخر جو چلے تھے سلجھانے

گیسوئے پریشاں سے وہ شکست کھائی ہے

ظلمت شب غم میں زندگی کی راہوں پر

شمع آرزو ہم نے مدتوں جلائی ہے

تم ہی گیسوؤں والو چھاؤں لے کے آ جاؤ

زندگی کی راہوں پر تیز دھوپ چھائی ہے

کاش دولت غم ہی اپنے پاس بچ رہتی

وہ بھی ان کو دے بیٹھے ایسی مات کھائی ہے

آپ روئے کیوں آخر سن کے قصۂ منظورؔ

آپ ہی بتائیں تو آنکھ کیوں بھر آئی ہے