زندگی کیسے عجب موڑ پہ لے آئی ہے

زندگی کیسے عجب موڑ پہ لے آئی ہے

بھیڑ سی بھیڑ ہے تنہائی سی تنہائی ہے

جو بھی ملتا ہے دعا دیتا ہے مرنے کی مجھے

دل لگانے کی بھی کیا خوب سزا پائی ہے

سر اٹھاتی ہوئی حسرت کا ہوا قتل عام

دل وہ دنیا ہے جہاں عالم تنہائی ہے

تم مرے سامنے آؤ تو عنایت ہوگی

دل کی دہلیز پہ بیٹھی ہوئی تنہائی ہے

جس کے جینے کے لیے تم نے دعا مانگی ہو

ایسے عاشق کو بھلا موت کہاں آئی ہے

خاک رکھے گا مرے زخم پہ مرہم آفیؔ

یہ زمانہ جو حقیقت میں تماشائی ہے