زلف دوراں ہے کہاں سایہ فگن میرے بعد

زلف دوراں ہے کہاں سایہ فگن میرے بعد

منتظر دیر سے ہیں دار و رسن میرے بعد

کس کو دل بستگئ غم کا سلیقہ سونپوں

سوچتا ہوں کہ نہ مر جائے یہ فن میرے بعد

میں زمانے سے اٹھا رسم وفا کی صورت

پھرنا ابھری کسی ماتھے پہ شکن میرے بعد

میرے دم تک تو زر گل کی بھی قیمت نہ اٹھی

خاک کے مول گئی ارض چمن میرے بعد

ہوشمندی کی سزا دے نہ کسی کو یا رب

دم بخود پہلے سے ہیں اہل وطن میرے بعد

بزم ہستی ہے کہ اک بولتا سناٹا ہے

آ گئی وقت کی سانسوں میں گھٹن میرے بعد

روشنی ساز زمانہ ہوں تو یہ عالم ہے

دیکھیے کیا ہو زمانے کا چلن میرے بعد

مل ہی جائے گا کوئی ظرف و نظر کا مارا

دل شکستہ نہ رہیں رنج و محن میرے بعد

وقت نے ذہنیتیں کتنی بدل ڈالی ہیں

بجلیاں تک ہیں ہوا خواہ چمن میرے بعد

مجھ پہ ہنستا ہے زمانہ تو کوئی بات نہیں

رنگ لائے گی مرے دل کی جلن میرے بعد

موت برحق ہے مگر شوقؔ یہ منظور نہیں

ان کے چہرے پہ ہو صدمے کی تھکن میرے بعد