ai sarwar-e-sher-o-adab-o-husn-e-taghazzul

ai sarvar-e-she'r-o-adab-o-husn-e-taġhazzul

rehlat kā nahīñ hai tirī yārā-e-tahammul

kam 'ishq nahīñ martaba-e-husn se bilkul

bedār kiyā tū ne ye ehsās-e-taqābul

majmū'a-e-afkār tirā kaif kī duniyā

aur 'ālam-e-pākīzgī-e-zauq-o-taḳhayyul

tū ne kiye taḳhlīq adab ke na.e shahkār

thā sinf-e-ġhazal meñ jo tirā fikr-o-ta.ammul

allah re tirā sidq-o-yaqīñ vaz'-o-sharāfat

maddāh haiñ ahl-e-dil o īsār o tavakkul

nazzāra-e-rā'nā.ī-e-shādābi-e-gulshan

gulzār-e-suḳhan kā hai tirā husn-o-tahammul

Dhālā hai taġhazzul ke na.e sāñchoñ meñ tū ne

mazmūn dil-o-chashm-o-lab-o-āriz-o-kākul

har she'r-e-dil-āvez chhalaktā huā sāġhar

har ek ġhazal ḳhūb-o-murassa' sabad-e-gul

thā husn-e-tarannum tirā firdaus-e-samā'at

ai faḳhr-e-adab qāfila-sālār-e-taġhazzul

thā tere har ik she'r pe tahsīn kā 'ālam

aur daad kā sanjīda-o-pur-lutf hasīñ ġhul

haiñ ḳhaas tanavvo’ se suḳhan meñ tire mazkūr

sarv-o-saman-o-nastaran-o-lāla-o-sumbul

hai terī ġhazal tab' kī pur-kaif ravānī

aur husn-e-ḳhayālāt kā dilchasp tasalsul

kuchh aur huī hai tire andāz-e-bayāñ se

pur-lutf-o-dil-āvez hadīs-e-gul-o-bulbul

'in'ām' du'ā-go hai mile rutba-e-‘ālī

jannat meñ tujhe sarvar-e-'ālam ke tavassul

ai sarwar-e-she'r-o-adab-o-husn-e-taghazzul

rehlat ka nahin hai teri yara-e-tahammul

kam 'ishq nahin martaba-e-husn se bilkul

bedar kiya tu ne ye ehsas-e-taqabul

majmu'a-e-afkar tera kaif ki duniya

aur 'alam-e-pakizgi-e-zauq-o-taKHayyul

tu ne kiye taKHliq adab ke nae shahkar

tha sinf-e-ghazal mein jo tera fikr-o-tammul

allah re tera sidq-o-yaqin waz'-o-sharafat

maddah hain ahl-e-dil o isar o tawakkul

nazzara-e-ra'nai-e-shadabi-e-gulshan

gulzar-e-suKHan ka hai tera husn-o-tahammul

Dhaala hai taghazzul ke nae sanchon mein tu ne

mazmun dil-o-chashm-o-lab-o-ariz-o-kakul

har she'r-e-dil-awez chhalakta hua saghar

har ek ghazal KHub-o-murassa' sabad-e-gul

tha husn-e-tarannum tera firdaus-e-sama'at

ai faKHr-e-adab qafila-salar-e-taghazzul

tha tere har ek she'r pe tahsin ka 'alam

aur dad ka sanjida-o-pur-lutf hasin ghul

hain KHas tanawwo’ se suKHan mein tere mazkur

sarw-o-saman-o-nastaran-o-lala-o-sumbul

hai teri ghazal tab' ki pur-kaif rawani

aur husn-e-KHayalat ka dilchasp tasalsul

kuchh aur hui hai tere andaz-e-bayan se

pur-lutf-o-dil-awez hadis-e-gul-o-bulbul

'in'am' du'a-go hai mile rutba-e-‘ali

jannat mein tujhe sarwar-e-'alam ke tawassul