اے سرور شعر و ادب و حسن تغزل

اے سرور شعر و ادب و حسن تغزل

رحلت کا نہیں ہے تری یارائے تحمل

کم عشق نہیں مرتبۂ حسن سے بالکل

بیدار کیا تو نے یہ احساس تقابل

مجموعۂ افکار ترا کیف کی دنیا

اور عالم پاکیزگیٔ ذوق و تخیل

تو نے کئے تخلیق ادب کے نئے شہکار

تھا صنف غزل میں جو ترا فکر و تأمل

اللہ رے ترا صدق و یقیں وضع و شرافت

مداح ہیں اہل دل و ایثار و توکل

نظارۂ رعنائئ شادابی گلشن

گلزار سخن کا ہے ترا حسن و تحمل

ڈھالا ہے تغزل کے نئے سانچوں میں تو نے

مضمون دل و چشم و لب و عارض و کاکل

ہر شعر دل آویز چھلکتا ہوا ساغر

ہر ایک غزل خوب و مرصع سبد گل

تھا حسن ترنم ترا فردوس سماعت

اے فخر ادب قافلۂ سالار تغزل

تھا تیرے ہر اک شعر پہ تحسین کا عالم

اور داد کا سنجیدہ و پر لطف حسیں غل

ہیں خاص تنوع سے سخن میں ترے مذکور

سرو و سمن و نسترن و لالہ و سنبل

ہے تیری غزل طبع کی پر کیف روانی

اور حسن خیالات کا دلچسپ تسلسل

کچھ اور ہوئی ہے ترے انداز بیاں سے

پر لطف و دل آویز حدیث گل و بلبل

انعامؔ دعا گو ہے ملے رتبۂ عالی

جنت میں تجھے سرور عالم کے توسل