hasinaon ko mashwara

hasīno agar tum ko hai pās-e-'izzat

to sun lo sunātā huuñ shā'ir kī fitrat

na mānogī merī to phūTegī qismat

rahegī muqaddar meñ zillat hī zillat

jo 'asrār' kahtā hai vo maan lo tum

ye kaise farebī haiñ ye jaan lo tum

ye zulfoñ kī chhāoñ ghanī chāhte haiñ

ye palkoñ kī chilman tanī chāhte haiñ

ye hoñToñ kī har dam honey chāhte haiñ

ye nāzuk badan kundanī chāhte haiñ

taḳhayyul meñ gang-o-jaman dekhte haiñ

hasīnoñ kā komal badan dekhte haiñ

dar-o-bām par in kī rahtī nazar hai

idhar hai jo laT-paT to gaT-paT udhar hai

hai in kī jabīñ aur hasīnoñ kā dar hai

kahāñ juute chappal kā in par asar hai

ye rusvā bhī kar ke chahete rahe haiñ

hasīnoñ pe mar mar ke jiite rahe haiñ

jahāñ mil ga.ī un ko koī hasīna

to aayā jabīñ par havas kā pasīna

samajh lo ki achchhā nahīñ hai qarīna

ḳhudā hī bachā.e ab us kā safīna

ye ġhairoñ kī biivī pe Dāleñ kamandeñ

vo chappal bhī māreñ to ye jān-o-tan deñ

kisī se ye kahte haiñ nāzuk kalī ho

mire dil kī raanī ho nāzoñ palī ho

mirī ārzūoñ kī raushan galī ho

vahīñ haiñ bahāreñ jahāñ tum chalī ho

ye sab chāplūsī kī bāteñ banā kar

unheñ mom karte haiñ Tasve bahā kar

dil-o-zehn ke ye baḌe hī futūrī

hasīnoñ ke aage kareñ jī-huzūrī

magar un ko kāfir bhī kahnā zarūrī

'ajab zaat in kī na naarī na nuurī

sunā kar mohabbat kā jhūTā fasāna

ye bulbul phañsāne ko rakhte haiñ daana

sadā in kī taḳh.īl jaalī rahī hai

hamesha se jeb in kī ḳhālī rahī hai

ḳhudī in kī har dam savālī rahī hai

har ik baat in kī nirālī rahī hai

tumhārī adāoñ pe bas jaan deñge

lagegī agar bhuuk to paan deñge

ye shā'ir haiñ shādī ke qaa.il nahīñ haiñ

ye 'āshiq haiñ dil in ke ghāyal nahīñ haiñ

ye majnūñ haiñ lailā pe maa.il nahīñ haiñ

ye ghaḌiyāñ haiñ vo jin meñ Dial nahīñ haiñ

hasīnoñ kī har dam banāte haiñ durgat

azal se hī hai chulbulī in kī fitrat

buḌhāpe meñ chiknī Dalī DhūñDte haiñ

chaman meñ ye nauras kalī DhūñDte haiñ

ye mūrat koī man-chalī DhūñDte haiñ

hasīnoñ kī har dam galī DhūñDte haiñ

lagāte haiñ is tarh galiyoñ kā chakkar

ki peḌoñ pe jaise uchhalte hoñ bandar

ye makḌe haiñ ḳhud in ke ash'ār jaale

vo makḌā jo makkhī ko jhaT se phañsā le

honey chuus le aur kachūmar nikāle

kare baa'd is ke ḳhudā ke havāle

yahī haal in kā hamesha rahā hai

yahī in kā derīna pesha rahā hai

ye sharm-o-hayā ko jafā mānte haiñ

jafā ko ye husn-o-adā mānte haiñ

ye zulfoñ ko kaalī ghaTā mānte haiñ

falak ko ye ulTā tavā mānte haiñ

jo samjhā.iye to bigaḌ jā.eñge ye

nadāmat ke badle ukhaḌ jā.eñge ye

ye karte nahīñ kuchh kamāte nahīñ haiñ

ye ḳhud khā to leñge khilāte nahīñ haiñ

ye bachchoñ ko apne paḌhāte nahīñ haiñ

ye kamroñ ko apne sajāte nahīñ haiñ

safā.ī ke dar par ye jaate nahīñ haiñ

ye shā'ir mahīnoñ nahāte nahīñ haiñ

jo mehmān aa.e koī in ke ghar par

to ye le ke baiTheñge she'roñ ke daftar

sunā.eñge ash'ār pahle to gā kar

pilā.eñge tab chaa.e tyorī chaḌhā kar

udhār aa.egī chā.e-ḳhānoñ se vo bhī

ki rahtī hai ghar meñ na chīnī na pattī

agar tum kabhī in kī begam banogī

koī baat in se machal kar kahogī

ye kah deñge matla' ġhazal kā sunogī

ḳhudā kī qasam sar ko apne dhunogī

sunā kar ġhazal bore karte raheñge

suneñge na kuchh shor karte raheñge

uḌāte rahe haiñ ye zehnī ġhubāra

nahīñ daal roTī kā garche sahārā

kisī ruḳh pe til kā ye kar ke nazārā

ye baḳhsheñ samarqand-o-tūs-o-buḳhārā

buḳhārā ke mālik ye aa.e kahāñ se

zarā koī pūchhe to shā'ir miyāñ se

hasīnoñ tumheñ mashvara hai hamārā

lagāo na dil shā'iroñ se ḳhudārā

nahīñ to uThātī rahogī ḳhasārā

ye hai ‘aql-mandoñ ko kaafī ishārā

sadā mubtalā haiñ ye zehnī ḳhalal meñ

nahīñ tāl-mel in ke qaul-o-'amal meñ

inheñ dekh kar muskurāo na hargiz

nadīdoñ se nazreñ laḌāo na hargiz

ġhazal in kī tum gungunāo na hargiz

kabhī in ke jhāñse meñ aao na hargiz

ye bhañvre haiñ kaliyoñ kā ras chūste haiñ

guloñ ko bhī misl-e-magas chūste haiñ

hasino agar tum ko hai pas-e-'izzat

to sun lo sunata hun sha'ir ki fitrat

na manogi meri to phuTegi qismat

rahegi muqaddar mein zillat hi zillat

jo 'asrar' kahta hai wo man lo tum

ye kaise farebi hain ye jaan lo tum

ye zulfon ki chhaon ghani chahte hain

ye palkon ki chilman tani chahte hain

ye honTon ki har dam honey chahte hain

ye nazuk badan kundani chahte hain

taKHayyul mein gang-o-jaman dekhte hain

hasinon ka komal badan dekhte hain

dar-o-baam par in ki rahti nazar hai

idhar hai jo laT-paT to gaT-paT udhar hai

hai in ki jabin aur hasinon ka dar hai

kahan jute chappal ka in par asar hai

ye ruswa bhi kar ke chahete rahe hain

hasinon pe mar mar ke jite rahe hain

jahan mil gai un ko koi hasina

to aaya jabin par hawas ka pasina

samajh lo ki achchha nahin hai qarina

KHuda hi bachae ab us ka safina

ye ghairon ki biwi pe Dalen kamanden

wo chappal bhi maren to ye jaan-o-tan den

kisi se ye kahte hain nazuk kali ho

mere dil ki rani ho nazon pali ho

meri aarzuon ki raushan gali ho

wahin hain bahaaren jahan tum chali ho

ye sab chaplusi ki baaten bana kar

unhen mom karte hain Taswe baha kar

dil-o-zehn ke ye baDe hi futuri

hasinon ke aage karen ji-huzuri

magar un ko kafir bhi kahna zaruri

'ajab zat in ki na nari na nuri

suna kar mohabbat ka jhuTa fasana

ye bulbul phansane ko rakhte hain dana

sada in ki taKHil jali rahi hai

hamesha se jeb in ki KHali rahi hai

KHudi in ki har dam sawali rahi hai

har ek baat in ki nirali rahi hai

tumhaari adaon pe bas jaan denge

lagegi agar bhuk to pan denge

ye sha'ir hain shadi ke qail nahin hain

ye 'ashiq hain dil in ke ghayal nahin hain

ye majnun hain laila pe mail nahin hain

ye ghaDiyan hain wo jin mein Dial nahin hain

hasinon ki har dam banate hain durgat

azal se hi hai chulbuli in ki fitrat

buDhape mein chikni Dali DhunDte hain

chaman mein ye nauras kali DhunDte hain

ye murat koi man-chali DhunDte hain

hasinon ki har dam gali DhunDte hain

lagate hain is tarh galiyon ka chakkar

ki peDon pe jaise uchhalte hon bandar

ye makDe hain KHud in ke ash'ar jale

wo makDa jo makkhi ko jhaT se phansa le

honey chus le aur kachumar nikale

kare ba'd is ke KHuda ke hawale

yahi haal in ka hamesha raha hai

yahi in ka derina pesha raha hai

ye sharm-o-haya ko jafa mante hain

jafa ko ye husn-o-ada mante hain

ye zulfon ko kali ghaTa mante hain

falak ko ye ulTa tawa mante hain

jo samjhaiye to bigaD jaenge ye

nadamat ke badle ukhaD jaenge ye

ye karte nahin kuchh kamate nahin hain

ye KHud kha to lenge khilate nahin hain

ye bachchon ko apne paDhate nahin hain

ye kamron ko apne sajate nahin hain

safai ke dar par ye jate nahin hain

ye sha'ir mahinon nahate nahin hain

jo mehman aae koi in ke ghar par

to ye le ke baiThenge she'ron ke daftar

sunaenge ash'ar pahle to ga kar

pilaenge tab chae tyori chaDha kar

udhaar aaegi chae-KHanon se wo bhi

ki rahti hai ghar mein na chini na patti

agar tum kabhi in ki begam banogi

koi baat in se machal kar kahogi

ye kah denge matla' ghazal ka sunogi

KHuda ki qasam sar ko apne dhunogi

suna kar ghazal bore karte rahenge

sunenge na kuchh shor karte rahenge

uDate rahe hain ye zehni ghubara

nahin dal roTi ka garche sahaara

kisi ruKH pe til ka ye kar ke nazara

ye baKHshen samarqand-o-tus-o-buKHara

buKHara ke malik ye aae kahan se

zara koi puchhe to sha'ir miyan se

hasinon tumhein mashwara hai hamara

lagao na dil sha'iron se KHudara

nahin to uThati rahogi KHasara

ye hai ‘aql-mandon ko kafi ishaara

sada mubtala hain ye zehni KHalal mein

nahin tal-mel in ke qaul-o-'amal mein

inhen dekh kar muskurao na hargiz

nadidon se nazren laDao na hargiz

ghazal in ki tum gungunao na hargiz

kabhi in ke jhanse mein aao na hargiz

ye bhanwre hain kaliyon ka ras chuste hain

gulon ko bhi misl-e-magas chuste hain