آج کل سے کچھ نہ طوفاں زا ہے چشم گریہ ناک

آج کل سے کچھ نہ طوفاں زا ہے چشم گریہ ناک

موجزن برسوں سے ہے دریا ہے چشم گریہ ناک

یوں نہ رؤو تو نہ رؤو ورنہ رود و چاہ سے

ہر قدم اس دشت میں پیدا ہے چشم گریہ ناک

دل سے آگے ٹک قدم رکھو تو پھر بھی دلبرو

سیر قابل دیدنی اک جا ہے چشم گریہ ناک

بے گداز دل نہیں امکان رونا اس قدر

تہ کو پہنچو خوب تو پردہ ہے چشم گریہ ناک

سوجھتا اپنا کرے کچھ ابر تو ہے مصلحت

جوش غم سے جیسے نا بینا ہے چشم گریہ ناک

سبز ہے رونے سے میرے گوشہ گوشہ دشت کا

باعث آبادیٔ صحرا ہے چشم گریہ ناک

وے حنائی پا مری آنکھوں ہی میں پھرتے ہیں میرؔ

یعنی ہر دم اس کے زیر پا ہے چشم گریہ ناک