بیماریٔ دلی سے زار و نزار ہیں ہم

بیماریٔ دلی سے زار و نزار ہیں ہم

اک مشت استخواں ہیں پر اپنے بار ہیں ہم

مارا تڑپتے چھوڑا فتراک سے نہ باندھا

بے چشم و رو کسو کے شاید شکار ہیں ہم

ہر دم جبیں خراشی ہر آن سینہ کاوی

حیران عشق تو ہیں پر گرم کار ہیں ہم

حور و قصور و غلماں نہر و نعیم و جنت

یہ کل ہم جہنم مشتاق یار ہیں ہم

بے حد و حصر گردش اپنی ہے عاشقی میں

رسوائے شہر و دیہہ و دشت و دیار ہیں ہم

اب سیل سیل آنسو آتے ہیں چشم تر سے

دیوار و در سے کہہ دو بے اختیار ہیں ہم

روتے ہیں یوں کہ جیسے شدت سے ابر برسے

کیا جانیے کہ کیسے دل کے بخار ہیں ہم

اب تو گلے بندھا ہے زنجیر و طوق ہونا

عشق و جنوں کے اپنے ناموس دار ہیں ہم

لیتا ہے میرؔ عبرت جو کوئی دیکھتا ہے

کیا یار کی گلی میں بے اعتبار ہیں ہم