ghafil hain aise sote hain goya jahan ke log

ġhāfil haiñ aise sote haiñ goyā jahāñ ke log

hālāñki raftanī haiñ sab is kārvāñ ke log

majnūñ-o-kohkan na talaf ishq meñ hue

marne pe jī hī dete haiñ is ḳhāndāñ ke log

kyūñkar kaheñ ki shahr-e-vafā meñ junūñ nahīñ

us ḳhasm-e-jāñ ke saare divāne haiñ yaañ ke log

raunaq thī dil meñ jab ta.iiñ baste the dil-barāñ

ab kyā rahā hai uTh ga.e sab is makāñ ke log

tū ham meñ aur aap meñ mat de kisū ko daḳhl

hote haiñ fitna-sāz yahī darmiyāñ ke log

marte haiñ us ke vāste yuuñ to bahut vale

kam-āshnā haiñ taur se us kām-e-jāñ ke log

pattī ko is chaman kī nahīñ dekhte haiñ garm

jo mahram-e-ravish haiñ kuchh us bad-gumāñ ke log

but chiiz kyā ki jis ko ḳhudā mānte haiñ sab

ḳhush-e'tiqād kitne haiñ hindostāñ ke log

firdaus ko bhī aañkh uThā dekhte nahīñ

kis darja sair-chashm haiñ kū-e-butāñ ke log

kyā sahl jī se haath uThā baiThte haiñ haa.e

ye ishq-peshgāñ haiñ ilāhī kahāñ ke log

muñh takte hī rahe haiñ sadā majlisoñ ke biich

goyā ki 'mīr' mahv haiñ merī zabāñ ke log

ghafil hain aise sote hain goya jahan ke log

haalanki raftani hain sab is karwan ke log

majnun-o-kohkan na talaf ishq mein hue

marne pe ji hi dete hain is KHandan ke log

kyunkar kahen ki shahr-e-wafa mein junun nahin

us KHasm-e-jaan ke sare diwane hain yan ke log

raunaq thi dil mein jab tain baste the dil-baran

ab kya raha hai uTh gae sab is makan ke log

tu hum mein aur aap mein mat de kisu ko daKHl

hote hain fitna-saz yahi darmiyan ke log

marte hain us ke waste yun to bahut wale

kam-ashna hain taur se us kaam-e-jaan ke log

patti ko is chaman ki nahin dekhte hain garm

jo mahram-e-rawish hain kuchh us bad-guman ke log

but chiz kya ki jis ko KHuda mante hain sab

KHush-e'tiqad kitne hain hindostan ke log

firdaus ko bhi aankh uTha dekhte nahin

kis darja sair-chashm hain ku-e-butan ke log

kya sahl ji se hath uTha baiThte hain hae

ye ishq-peshgan hain ilahi kahan ke log

munh takte hi rahe hain sada majlison ke bich

goya ki 'mir' mahw hain meri zaban ke log