غافل ہیں ایسے سوتے ہیں گویا جہاں کے لوگ

غافل ہیں ایسے سوتے ہیں گویا جہاں کے لوگ

حالانکہ رفتنی ہیں سب اس کارواں کے لوگ

مجنوں و کوہ کن نہ تلف عشق میں ہوئے

مرنے پہ جی ہی دیتے ہیں اس خانداں کے لوگ

کیونکر کہیں کہ شہر وفا میں جنوں نہیں

اس خصم جاں کے سارے دوانے ہیں یاں کے لوگ

رونق تھی دل میں جب تئیں بستے تھے دلبراں

اب کیا رہا ہے اٹھ گئے سب اس مکاں کے لوگ

تو ہم میں اور آپ میں مت دے کسو کو دخل

ہوتے ہیں فتنہ ساز یہی درمیاں کے لوگ

مرتے ہیں اس کے واسطے یوں تو بہت ولے

کم آشنا ہیں طور سے اس کام جاں کے لوگ

پتی کو اس چمن کی نہیں دیکھتے ہیں گرم

جو محرم روش ہیں کچھ اس بد گماں کے لوگ

بت چیز کیا کہ جس کو خدا مانتے ہیں سب

خوش اعتقاد کتنے ہیں ہندوستاں کے لوگ

فردوس کو بھی آنکھ اٹھا دیکھتے نہیں

کس درجہ سیر چشم ہیں کوئے بتاں کے لوگ

کیا سہل جی سے ہاتھ اٹھا بیٹھتے ہیں ہائے

یہ عشق پیشگاں ہیں الٰہی کہاں کے لوگ

منہ تکتے ہی رہے ہیں سدا مجلسوں کے بیچ

گویا کہ میرؔ محو ہیں میری زباں کے لوگ