گل کو ہوتا صبا قرار اے کاش

گل کو ہوتا صبا قرار اے کاش

رہتی ایک آدھ دن بہار اے کاش

یہ جو دو آنکھیں مند گئیں میری

اس پہ وا ہوتیں ایک بار اے کاش

کن نے اپنی مصیبتیں نہ گنیں

رکھتے میرے بھی غم شمار اے کاش

جان آخر تو جانے والی تھی

اس پہ کی ہوتی میں نثار اے کاش

اس میں راہ سخن نکلتی تھی

شعر ہوتا ترا شعار اے کاش

خاک بھی وہ تو دیوے گا بر باد

نہ بناویں مرا مزار اے کاش

شش جہت اب تو تنگ ہے ہم پر

اس سے ہوتے نہ ہم دو چار اے کاش

مرتے بھی تو ترے ہی کوچے میں

ملتی یاں جائے گور وار اے کاش

ان لبوں کے گلے سے دل ہے بھرا

چل پڑے بات پیش یار اے کاش

بے اجل میرؔ اب پڑا مرنا

عشق کرتے نہ اختیار اے کاش