گزار خوش نگاہاں جس میں ہے میرا بیاباں ہے

گزار خوش نگاہاں جس میں ہے میرا بیاباں ہے

سواد بر مجنوں تو چراگاہ غزالاں ہے

کرے ہے خندۂ دنداں نما تو میں بھی روؤں گا

چمکتی زور ہے بجلی مقرر آج باراں ہے

چمن پر نوحہ و زاری سے کس گل کا یہ ماتم ہے

جو شبنم ہے تو گریاں ہے جو بلبل ہے تو نالاں ہے

ہر اک مژگاں پہ میری اشک کے قطرے جھمکتے ہیں

تماشا مفت خوباں ہے لب دریا چراغاں ہے

کیا تھا جا بجا رنگیں لہو تجھ ہجر میں رو کر

گریباں میرؔ کا دیکھا مگر گلچیں کا داماں ہے