ishq hamara darpa-e-jaan hai kaisi KHusumat karta hai

ishq hamārā darpa-e-jāñ hai kaisī ḳhusūmat kartā hai

chain nahīñ detā hai zālim jab tak āshiq martā hai

shāyad lambe baal us mah ke bikhar ga.e the baav chale

dil to pareshāñ thā hī merā raat se jī bhī bikhartā hai

sūrat us kī dīda-e-tar meñ phirtī hai har roz-o-shab

hai na achambhā ye bhī kahīñ paanī meñ naqsh ubhartā hai

kyā dushvār guzar hai tarīq-e-ishq musāfir-kush yaaro

jī se apne guzar jaatā hai jo is raah guzartā hai

haal kisū be-tah kā yaañ maanā hai habāb dariyā se

Tuk jo havā duniyā kī lagī to ye kam-zarf aphartā hai

yaad ḳhudā ko kar ke kaho Tuk paas hamāre ho jaave

sad-sāla ġham dekhe us ḳhush-chashm-o-rū kī basartā hai

dāman dīda-e-tar kī vus.at dekhe hī ban āvegī

abr-e-siyāh-o-safed jo ho so paanī in kā bhartā hai

dil kī laag nahīñ chhuptī hai koī chhupāve bahuterā

zardī-e-ishq se be-ulfat ye rang kisū kā nikhartā hai

khīñch ke teġha apnā har dam kyā logoñ ko Darāte ho

'mīr' jigar-dār aadmī hai vo kab marne se Dartā hai

ishq hamara darpa-e-jaan hai kaisi KHusumat karta hai

chain nahin deta hai zalim jab tak aashiq marta hai

shayad lambe baal us mah ke bikhar gae the baw chale

dil to pareshan tha hi mera raat se ji bhi bikharta hai

surat us ki dida-e-tar mein phirti hai har roz-o-shab

hai na achambha ye bhi kahin pani mein naqsh ubharta hai

kya dushwar guzar hai tariq-e-ishq musafir-kush yaro

ji se apne guzar jata hai jo is rah guzarta hai

haal kisu be-tah ka yan mana hai habab dariya se

Tuk jo hawa duniya ki lagi to ye kam-zarf apharta hai

yaad KHuda ko kar ke kaho Tuk pas hamare ho jawe

sad-sala gham dekhe us KHush-chashm-o-ru ki basarta hai

daman dida-e-tar ki wusat dekhe hi ban aawegi

abr-e-siyah-o-safed jo ho so pani in ka bharta hai

dil ki lag nahin chhupti hai koi chhupawe bahutera

zardi-e-ishq se be-ulfat ye rang kisu ka nikharta hai

khinch ke tegha apna har dam kya logon ko Daraate ho

'mir' jigar-dar aadmi hai wo kab marne se Darta hai