عشق ہمارا درپئے جاں ہے کیسی خصومت کرتا ہے

عشق ہمارا درپئے جاں ہے کیسی خصومت کرتا ہے

چین نہیں دیتا ہے ظالم جب تک عاشق مرتا ہے

شاید لمبے بال اس مہ کے بکھر گئے تھے باؤ چلے

دل تو پریشاں تھا ہی میرا رات سے جی بھی بکھرتا ہے

صورت اس کی دیدۂ تر میں پھرتی ہے ہر روز و شب

ہے نہ اچنبھا یہ بھی کہیں پانی میں نقش ابھرتا ہے

کیا دشوار گزر ہے طریق عشق مسافر کش یارو

جی سے اپنے گزر جاتا ہے جو اس راہ گزرتا ہے

حال کسو بے تہہ کا یاں مانا ہے حباب دریا سے

ٹک جو ہوا دنیا کی لگی تو یہ کم ظرف اپھرتا ہے

یاد خدا کو کر کے کہو ٹک پاس ہمارے ہو جاوے

صد سالہ غم دیکھے اس خوش چشم و رو کی بسرتا ہے

دامن دیدۂ تر کی وسعت دیکھے ہی بن آوے گی

ابر سیاہ و سفید جو ہو سو پانی ان کا بھرتا ہے

دل کی لاگ نہیں چھپتی ہے کوئی چھپاوے بہتیرا

زردیٔ عشق سے بے الفت یہ رنگ کسو کا نکھرتا ہے

کھینچ کے تیغہ اپنا ہر دم کیا لوگوں کو ڈراتے ہو

میرؔ جگر دار آدمی ہے وہ کب مرنے سے ڈرتا ہے