jangal mein chashm kis se basti ki rahbari ki

jangal meñ chashm kis se bastī kī rahbarī kī

sāhib hī ne hamāre ye banda-parvarī kī

shab sun ke shor merā kuchh kī na be-dimāġhī

us kī galī ke sag ne kiyā ādmī-garī kī

karte nahīñ haiñ dil ḳhuuñ is rang se kisū kā

ham dil-shudoñ kī un ne kyā ḳhuub dilbarī kī

allah re kyā namak hai aadam ke husn meñ bhī

achchhī lagī na ham ko ḳhush-sūratī parī kī

hai apnī mahr-varzī jāñ-kāh-o-dil-gudāzāñ

is ranj meñ nahīñ hai ummīd behtarī kī

raftār-e-nāz kā hai pāmāl ek aalam

us ḳhud-numā ne kaisī ḳhud-rā.ī ḳhud-sarī kī

ai kaash ab na chhoḌe sayyād qaidiyoñ ko

jī hī se mārtī hai āzādī be-parī kī

us rashk-e-mah se har shab hai ġhair se laḌā.ī

baḳht-e-siyah ne baare in rozoñ yāvarī kī

khuT-pachriyāñ hī kī haiñ sarrāf ke ne ham se

paise de be-ruī kī phir le ga.e kharī kī

guzre basān-e-sarsar aalam se be-ta.ammul

afsos 'mīr' tum ne kyā sair sarsarī kī

jangal mein chashm kis se basti ki rahbari ki

sahib hi ne hamare ye banda-parwari ki

shab sun ke shor mera kuchh ki na be-dimaghi

us ki gali ke sag ne kiya aadmi-gari ki

karte nahin hain dil KHun is rang se kisu ka

hum dil-shudon ki un ne kya KHub dilbari ki

allah re kya namak hai aadam ke husn mein bhi

achchhi lagi na hum ko KHush-surati pari ki

hai apni mahr-warzi jaan-kah-o-dil-gudazan

is ranj mein nahin hai ummid behtari ki

raftar-e-naz ka hai pamal ek aalam

us KHud-numa ne kaisi KHud-rai KHud-sari ki

ai kash ab na chhoDe sayyaad qaidiyon ko

ji hi se marti hai aazadi be-pari ki

us rashk-e-mah se har shab hai ghair se laDai

baKHt-e-siyah ne bare in rozon yawari ki

khuT-pachriyan hi ki hain sarraf ke ne hum se

paise de be-rui ki phir le gae khari ki

guzre basan-e-sarsar aalam se be-tammul

afsos 'mir' tum ne kya sair sarsari ki