شیخی کا اب کمال ہے کچھ اور

شیخی کا اب کمال ہے کچھ اور

حال ہے اور قال ہے کچھ اور

وعدے برسوں کے کن نے دیکھے ہیں

دم میں عاشق کا حال ہے کچھ اور

سہل مت بوجھ یہ طلسم جہاں

ہر جگہ یاں خیال ہے کچھ اور

تو رگ جاں سمجھتی ہوگی نسیم

اس کے گیسو کا بال ہے کچھ اور

نہ ملیں گو کہ ہجر میں مر جائیں

عاشقوں کا وصال ہے کچھ اور

کوزہ پشتی پہ شیخ کی مت جاؤ

اس پہ بھی احتمال ہے کچھ اور

اس میں اس میں بڑا تفاوت ہے

کبک کی چال ڈھال ہے کچھ اور

میرؔ تلوار چلتی ہے تو چلے

خوش خراموں کی چال ہے کچھ اور