تکلیف باغ کن نے کی تجھ خوش دہاں کے تیں

تکلیف باغ کن نے کی تجھ خوش دہاں کے تیں

دیتا ہے آگ رنگ ترا گلستاں کے تیں

تنکا بھی اب رہا نہیں شرمندگی ہے جو

گر پڑ کے برق پاوے مرے آشیاں کے تیں

آئے عدم سے ہستی میں تس پر نہیں قرار

ہے ان مسافروں کا ارادہ کہاں کے تیں

سناہٹے سے باغ سے کچھ اٹھتے ہیں نسیم

مرغ چمن نے خوب متھا ہے فغاں کے تیں

بے رحم ٹک تو پاؤں تو چھاتی پہ رکھے رہ

مارا بھی ہے کبھی تیں کسی خستہ جاں کے تیں

اک گردش اے فلک کہ ہو اثنائے راہ سے

کنعاں کی اور راہ غلط کارواں کے تیں

تو اک زباں پہ چپکی نہیں رہتی عندلیب

رکھتا ہے منہ میں غنچۂ گل سو زباں کے تیں

دیکھے کہاں ہیں زلف تری مردمان شہر

سودا ہوا ہے کہنے لگے اس جواں کے تیں

ہم تو ہوئے تھے میرؔ سے اس دن ہی ناامید

جس دن سنا کہ ان نے دیا دل بتاں کے تیں