ٹیڑھی نگاہیں کیا کرتے ہو دم بھر کے یاں آنے پر

ٹیڑھی نگاہیں کیا کرتے ہو دم بھر کے یاں آنے پر

ایدھر دیکھو ہم نے نہیں کی خم ابرو مر جانے پر

زور ہوا ہے چل صوفی ٹک تو بھی رباط کہنہ سے

ابر قبلہ بڑھتا بڑھتا آیا ہے میخانے پر

گل کھائے بے تہہ بلبل نے شور قیامت کا سا کیا

دیکھ چمن میں اس بن میرے چپکے جی بہلانے پر

سر نیچے کر لیتا تھا تلوار چلاتے ہم پر وے

ریجھ گئے خوں ریزی میں اپنی اس کے پھر شرمانے پر

گالی مار کے غم پر میں نے صبر کیا خاموش رہا

رحم نہ آیا ٹک ظالم کو اس میرے غم کھانے پر

نادیدہ ہیں نام خدا کے ایسے جیسے قحط زدہ

دوڑتی ہیں کیا آنکھیں اپنی سبحے کے دانے دانے پر

حال پریشاں سن مجنوں کا کیا جلتا ہے جی اپنا

عاشق ہم بھی میرؔ رہے ہیں اس ڈھب کے دیوانے پر