خواب میں زلف کو مکھڑے سے لگا لے آ جا

خواب میں زلف کو مکھڑے سے لگا لے آ جا

بے نقاب آج تو اے گیسوؤں والے آ جا

بے کسی پر مری خوں روتے ہیں چھالے آ جا

راہ میں چھوڑ گئے قافلے والے آ جا

کون ہے ماہ عرب کون ہے محبوب خدا

اے دو عالم کے حسینوں سے نرالے آ جا

دم تری دید کو آنکھوں میں لگا رکھا ہے

لے رہے ہیں ترے بیمار سنبھالے آ جا

ہوں سیہ کار مرے عیب کھلے جاتے ہیں

کملی والے مجھے کملی میں چھپا لے آ جا

پہنچا محبوب تو مشاطۂ قدرت نے کہا

خلوت ناز میں اے ناز کے پالے آ جا

رنگ وحدت ہے یہاں غنچۂ خلوت ہے یہاں

اے گل گلشن لولاک کمانے آ جا

صورت لالہ ہے پر داغ بیاںؔ کا سینہ

پڑ رہے ہیں ترے بیمار کے لالے آ جا