کیوں قرار آتا نہیں دل کو کسی صورت نہ پوچھ

کیوں قرار آتا نہیں دل کو کسی صورت نہ پوچھ

اشتیاق رویت حضرت کی کیفیت نہ پوچھ

جھک رہی ہے آج بھی قدموں پر ان کے کائنات

خاکساران شہہ کونین کی عظمت نہ پوچھ

جاگزیں دل میں مرے عشق شہ لولاک ہے

بارگاہ قدس میں اس کی ہے کیا قیمت نہ پوچھ

جس کے آگے ہے بہار گلشن جنت خجل

کتنی دل کش ہے فضائے روضۂ حضرت نہ پوچھ

کہیے اس کو مخزن اسرار تو بالکل بجا

دل میں پوشیدہ ہے کس کے عشق کی دولت نہ پوچھ

جب زباں پر آ گیا نام احمد مختار کا

رنج میں بھی مل گئی ہے کس قدر راحت نہ پوچھ

ہوں غلام شافع محشر جمالیؔ غم نہیں

اپنی بخشش کی نکل آئے گی کیا صورت نہ پوچھ