baar-e-KHvaahish

insaan laalach kartaa hai

ye us kii haDDiyo.n me.n rakhaa hu.aa

ek narm saa sho'la hai

jo mauqa' milte hii bha.Dak uThtaa hai

hamaare abbaa ne bhii

ek din josh kii peshaanii chuum kar

baar-e-amaanat sar par rakh liyaa thaa

sochaa thaa qaamat siidhii rahegii

magar bojh ne

ghuTno.n se pahle anaa to.D dii

sharmindagii

insaan kaa pahlaa ustaad hai

laalach

sirf zar kaa nahii.n hotaa

kabhii naam kaa

kabhii davaam kaa

kabhii is yaqiin kaa

ki mai.n Galat nahii.n ho saktaa

kahte hai.n

qaabiil ne husn kii chaah me.n

KHuun kii pahlii lakiir khii.nchii

aur haabiil bhii

qubuuliyyat ke Guruur se KHaalii na thaa

ibraahiim ne KHushnuudii chaahii

aur aag ko daliil banaa diyaa

fir'aun ne KHudaa.ii maa.ngii

aur dariyaa me.n utar gayaa

namruud ne baadshaahat ko aasmaan tak uchhaalaa

aur ek maa'muulii zarb sah na sakaa

qaaruun ne daulat ko davaam samjhaa

aur zamiin ne use apnii gavaahii me.n dafn kar diyaa

zamaana badaltaa rahtaa hai

laalach kii taa'riife.n badaltii rahtii hai.n

magar maa'nii vahii rahte hai.n

mai.n ne bhii laalach kiyaa

ek KHvaab kaa

ek tartiib kaa

ek aisii 'aurat kaa

jo mere be-tartiib dino.n ko

qariine se rakh de

mai.n ne sochaa thaa

vo mere ghar kii diivaaro.n par

sukuun kii safedii pher degii

aur mai.n

apne vahm kii saltanat me.n

ek shahzaade kii tarah rahuu.ngaa

magar husn

jab KHud ko aa.iina samajhne lage

to saamne kha.Daa shaKHs

mahaz 'aks rah jaataa hai

vo zahiin thii

aur mai.n

mohabbat ko daliil samajhne kii Galatii me.n mubtalaa

phir yuu.n hu.aa

ki ilzaam

mere naam kaa duusraa juzv ban gayaa

zillat

merii peshaanii kaa isti'aara

aur KHaamoshii

merii vaahid panaah

mai.n ne mohabbat kaa daaman nahii.n chho.Daa

kyuu.nki mujhe sikhaayaa gayaa thaa

ki 'aurat ko mu'aaf kar denaa

mardaangii kii me'raaj hai

magar mu'aafii

jab yak-tarfa ho

to insaaf yatiim ho jaataa hai

mohabbat

duusre par haq jataane kaa naam nahii.n

magar ham 'ibaadat me.n bhii

jazaa ke ummiid-vaar rahte hai.n

KHvaahish aur haakimiyyat ke darmiyaan

ek baariik lakiir hotii hai

ise paar karte hii

mohabbat

mu'aahida ban jaatii hai

mai.n ne chaahaa

ki mere jazbaat kii taa'ziim ho

merii bartarii tasliim kii jaa.e

aur rishta

itaa'at ke sutuuno.n par kha.Daa ho

magar insaan

nisyaan kaa putlaa hai

aaj kaa vaa'da

kal kii yaad-daasht me.n nahii.n rahtaa

mai.n tum se behtar paa saktii huu.n

ye jumla nahii.n

ek zalzala hai

jo mard ke vujuud me.n

sadiyo.n se taa'miir kii ga.ii 'imaarat giraa detaa hai

laalach

jab apnii taujiih KHud gha.Dne lage

to KHvaahish nahii.n rahtaa

jabr ban jaataa hai

aur jabr

har rishte kaa pahlaa zavaal hai

ab mai.n laalach se Dartaa nahii.n

use pahchaan letaa huu.n

vo jab du'aa bane

to sar jhukaa detaa huu.n

aur jab Guruur bane

to aa.nkh band kar letaa huu.n

ab mai.n KHvaahish se inkaar nahii.n kartaa

magar use naam dene se pahle

apnaa zarf dekh letaa huu.n

asl imtihaan

duusre ko haasil karnaa nahii.n

KHud ko pahchaan.naa hai

insaan laalach kartaa hai

ye us kii haDDiyo.n me.n rakhaa hu.aa

ek narm saa sho'la hai

jo mauqa' milte hii bha.Dak uThtaa hai

hamaare abbaa ne bhii

ek din josh kii peshaanii chuum kar

baar-e-amaanat sar par rakh liyaa thaa

sochaa thaa qaamat siidhii rahegii

magar bojh ne

ghuTno.n se pahle anaa to.D dii

sharmindagii

insaan kaa pahlaa ustaad hai

laalach

sirf zar kaa nahii.n hotaa

kabhii naam kaa

kabhii davaam kaa

kabhii is yaqiin kaa

ki mai.n Galat nahii.n ho saktaa

kahte hai.n

qaabiil ne husn kii chaah me.n

KHuun kii pahlii lakiir khii.nchii

aur haabiil bhii

qubuuliyyat ke Guruur se KHaalii na thaa

ibraahiim ne KHushnuudii chaahii

aur aag ko daliil banaa diyaa

fir'aun ne KHudaa.ii maa.ngii

aur dariyaa me.n utar gayaa

namruud ne baadshaahat ko aasmaan tak uchhaalaa

aur ek maa'muulii zarb sah na sakaa

qaaruun ne daulat ko davaam samjhaa

aur zamiin ne use apnii gavaahii me.n dafn kar diyaa

zamaana badaltaa rahtaa hai

laalach kii taa'riife.n badaltii rahtii hai.n

magar maa'nii vahii rahte hai.n

mai.n ne bhii laalach kiyaa

ek KHvaab kaa

ek tartiib kaa

ek aisii 'aurat kaa

jo mere be-tartiib dino.n ko

qariine se rakh de

mai.n ne sochaa thaa

vo mere ghar kii diivaaro.n par

sukuun kii safedii pher degii

aur mai.n

apne vahm kii saltanat me.n

ek shahzaade kii tarah rahuu.ngaa

magar husn

jab KHud ko aa.iina samajhne lage

to saamne kha.Daa shaKHs

mahaz 'aks rah jaataa hai

vo zahiin thii

aur mai.n

mohabbat ko daliil samajhne kii Galatii me.n mubtalaa

phir yuu.n hu.aa

ki ilzaam

mere naam kaa duusraa juzv ban gayaa

zillat

merii peshaanii kaa isti'aara

aur KHaamoshii

merii vaahid panaah

mai.n ne mohabbat kaa daaman nahii.n chho.Daa

kyuu.nki mujhe sikhaayaa gayaa thaa

ki 'aurat ko mu'aaf kar denaa

mardaangii kii me'raaj hai

magar mu'aafii

jab yak-tarfa ho

to insaaf yatiim ho jaataa hai

mohabbat

duusre par haq jataane kaa naam nahii.n

magar ham 'ibaadat me.n bhii

jazaa ke ummiid-vaar rahte hai.n

KHvaahish aur haakimiyyat ke darmiyaan

ek baariik lakiir hotii hai

ise paar karte hii

mohabbat

mu'aahida ban jaatii hai

mai.n ne chaahaa

ki mere jazbaat kii taa'ziim ho

merii bartarii tasliim kii jaa.e

aur rishta

itaa'at ke sutuuno.n par kha.Daa ho

magar insaan

nisyaan kaa putlaa hai

aaj kaa vaa'da

kal kii yaad-daasht me.n nahii.n rahtaa

mai.n tum se behtar paa saktii huu.n

ye jumla nahii.n

ek zalzala hai

jo mard ke vujuud me.n

sadiyo.n se taa'miir kii ga.ii 'imaarat giraa detaa hai

laalach

jab apnii taujiih KHud gha.Dne lage

to KHvaahish nahii.n rahtaa

jabr ban jaataa hai

aur jabr

har rishte kaa pahlaa zavaal hai

ab mai.n laalach se Dartaa nahii.n

use pahchaan letaa huu.n

vo jab du'aa bane

to sar jhukaa detaa huu.n

aur jab Guruur bane

to aa.nkh band kar letaa huu.n

ab mai.n KHvaahish se inkaar nahii.n kartaa

magar use naam dene se pahle

apnaa zarf dekh letaa huu.n

asl imtihaan

duusre ko haasil karnaa nahii.n

KHud ko pahchaan.naa hai