walid ke intiqal par

vo chālīs rātoñ se soyā na thā

vo ḳhvāboñ ko ūñToñ pe laade hue

raat ke regzāroñ meñ chaltā rahā

chāndnī kī chitāoñ meñ jaltā rahā

mez par

kāñch ke ik pyāle meñ rakkhe hue

daañt hañste rahe

kaalī ainak ke shīshoñ ke pīchhe se phir

motiye kī kalī sar uThāne lagī

aañkh meñ tīrgī muskurāne lagī

ruuh kā haath

chhalnī huā suuī kī nok se

ḳhvāhishoñ ke diye

jism meñ bujh ga.e

sabz paanī kī sayyāl parchhā.iyāñ

lamha lamha band meñ utarne lagīñ

ghar kī chhat meñ jaḌe

das sitāroñ ke sāyoñ tale

aks dhundlā ga.e

aks murjhā ga.e

wo chaalis raaton se soya na tha

wo KHwabon ko unTon pe lade hue

raat ke regzaron mein chalta raha

chandni ki chitaon mein jalta raha

mez par

kanch ke ek pyale mein rakkhe hue

dant hanste rahe

kali ainak ke shishon ke pichhe se phir

motiye ki kali sar uThane lagi

aankh mein tirgi muskurane lagi

ruh ka hath

chhalni hua sui ki nok se

KHwahishon ke diye

jism mein bujh gae

sabz pani ki sayyal parchhaiyan

lamha lamha band mein utarne lagin

ghar ki chhat mein jaDe

das sitaron ke sayon tale

aks dhundla gae

aks murjha gae