بے نام نظمیں

اخبار کے بکھرے ہوئے پنوں میں

یا شاید

واٹس ایپ کے کسی گروپ میں کہیں

اس نے پڑھی تھیں

کچھ درد میں ڈوبی غم ہجراں سے معطر

مانوس سے الفاظ میں پہچانی سی سطریں

بے نام سی نظمیں

جن میں کہیں شاعر کا کوئی نام نہیں تھا

ممکن ہے کہ ان نظموں سے

کچھ انس شناسائی یا شاید کوئی رشتہ

اسے محسوس ہوا ہو

شاید اسے یاد آیا ہو اک ربط پرانا

ان بکھری ہوئی نظموں سا

ممکن ہے کہ

وہ ربط بھی اس کے لیے بے نام رہا ہو

جو بھی ہو

مگر اس نے وہ نظمیں مجھے بھیجیں

الفاظ کفایت سے برتتے ہوئے پوچھا

لہجہ تو تمہارا ہے یہ تم نے ہی لکھی ہیں

میں دیر سے بس سوچ رہا ہوں اسے پوچھوں

واقف ہو مرے غم سے مری آہوں سے اب بھی

احساس ابھی تک ہے مرے درد کا تم کو

الفاظ برتنے کا سلیقہ نہیں بھولی

تازہ ہے ابھی ذہن میں نظموں کا بھی لہجہ

تم اتنا سمجھتی ہو مجھے پھر یہ بتاؤ

ہم پاس رہے اتنے تو اب فاصلہ کیوں ہے