دور ہمارا باقی ہے

اک بازی گرچہ مات ہوئی اک دنیا اب بھی باقی ہے

اک صدی ہمارے نام سے تھی اک دور ہمارا باقی ہے

منڈی میں سرمائے کی جب انساں بیچے جاتے تھے

جب عصمت رسوا ہوتی تھی جب محنت کا کچھ مول نہ تھا

تب سنگینوں کی نوک پہ ہم نے امن پھریرے باندھے تھے

ایسے ان گن قصہ ہیں ہرچند فسانہ باقی ہے

تاج اچھالے ہیں ہم نے اور تخت پہ جا کے بیٹھے ہیں

آزادی کی راہ میں ہم نے تختے پھندے چومے ہیں

بستی بستی جاگ اٹھی اور دور نو بیدار ہوا

وہ دور کہ جس کا وعدہ تھا وہ دور ابھی پر باقی ہے