f b friend

chehra us kā saada sā hai gesū haiñ pechāk

palkeñ tīroñ jaisī haiñ aur lahja hai bebāk

har ik dost ke baare meñ raa.e us kī be-lāg

jis ko sun kar kuchh logoñ ko lag jaatī hai aag

f b par jo dost hai us kī nazmoñ meñ hai kaun

rangoñ aur ḳhushbūoñ jaisī ġhazloñ meñ hai kaun

kaun hai bhaa.ī ban kar us ke qurb kā ḳhvāhish-mand

kis ne beTī kah kar dekhe pairāhan ke band

kis kī āñkhoñ meñ raushan hai niyyat kā iḳhlās

kis ke jazboñ meñ hai taaza phūloñ kī bū-bās

jhāñke vo lafzoñ ke andar mā'nī aḳhz kare

she'r ke ā.īne meñ utre shā'ir tak pahuñche

chehre se hai bholī-bhālī andar se chālāk

kaun use dekhe hai kaise us ko hai idrāk

chehra us ka sada sa hai gesu hain pechaak

palken tiron jaisi hain aur lahja hai bebak

har ek dost ke bare mein rae us ki be-lag

jis ko sun kar kuchh logon ko lag jati hai aag

f b par jo dost hai us ki nazmon mein hai kaun

rangon aur KHushbuon jaisi ghazlon mein hai kaun

kaun hai bhai ban kar us ke qurb ka KHwahish-mand

kis ne beTi kah kar dekhe pairahan ke band

kis ki aankhon mein raushan hai niyyat ka iKHlas

kis ke jazbon mein hai taza phulon ki bu-bas

jhanke wo lafzon ke andar ma'ni aKHz kare

she'r ke aaine mein utre sha'ir tak pahunche

chehre se hai bholi-bhaali andar se chaalak

kaun use dekhe hai kaise us ko hai idrak