ghunchagi ka safar

vo naujavān umangoñ kī garm-bāzārī

muhīt-e-zāt vo ik be-karāñ ḳhud-āzādī

vo tamtamāte hue din vo sāñvlī rāteñ

vo kam-sinī kā tamavvuj vo dil kī sarshārī

vo sin ki jis ne bas ik lazzat-e-nazar ke liye

na jaane kitne darīchoñ se kī vafādārī

vo sin ki tund ho is darja quvvat-e-ehsās

ki har ḳhushī pe ho andoh mustaqil taarī

kabhī badūn-e-sabab sarḳhushī kī kaifiyyat

kabhī ye haal ki be-vaj.h girya-o-zārī

kabhī 'itāb-e-buzurgāñ ke ḳhauf se paidā

galī ke moḌ pe be-vaj.h tez-raftārī

kisī kā 'aks-e-tilā.ī gale lagā.e hue

udaas raat kī tanhā.iyoñ meñ bedārī

kabhī kisī se achānak jo sāmnā ho jaa.e

to sansanā.e rag-o-pai meñ kaif-e-sarshārī

agar laboñ se tabassum kī ik kiran phūTe

to chāñdnī meñ nahā jaa.e raat añdhiyārī

vafūr-e-sharm se palkeñ agar jhapak jaa.eñ

dil-o-jigar meñ tarāzū hoñ barchhiyāñ saarī

kabhī gar us ruḳh-e-tābinda par ho gard-e-malāl

to apnī jaañ se nahīñ do jahāñ se bezārī

qadam qadam pe shikast-e-ḳhayāl kā mātam

galī galī meñ tamannāoñ kī 'azā-dārī

kabhī hujūm-e-tamannā meñ 'arz-e-hāl ke vaqt

kisī ġhazāl-e-hirāsāñ kī tez raftārī

kisī sitāra-e-tanhā kā irti'āsh-e-ḳhafī

kisī alaav meñ sahmī huī sī chingārī

havā ke ruḳh pe kisī bādbān kī larzish

kisī chakor kī rātoñ meñ girya-o-zārī

lab-e-savāl pe ThiTkā huā koī maqsad

dayār-e-ġhair meñ ik ajnabī kī dushvārī

ye ġhunchagī kā safar thā shaguftagī kī taraf

ki jaise ḳhvāb kī karvaT meñ 'azm-e-bedārī

wo naujawan umangon ki garm-bazari

muhit-e-zat wo ek be-karan KHud-azadi

wo tamtamate hue din wo sanwli raaten

wo kam-sini ka tamawwuj wo dil ki sarshaari

wo sin ki jis ne bas ek lazzat-e-nazar ke liye

na jaane kitne darichon se ki wafadari

wo sin ki tund ho is darja quwwat-e-ehsas

ki har KHushi pe ho andoh mustaqil tari

kabhi badun-e-sabab sarKHushi ki kaifiyyat

kabhi ye haal ki be-wajh girya-o-zari

kabhi 'itab-e-buzurgan ke KHauf se paida

gali ke moD pe be-wajh tez-raftari

kisi ka 'aks-e-tilai gale lagae hue

udas raat ki tanhaiyon mein bedari

kabhi kisi se achanak jo samna ho jae

to sansanae rag-o-pai mein kaif-e-sarshaari

agar labon se tabassum ki ek kiran phuTe

to chandni mein naha jae raat andhiyari

wafur-e-sharm se palken agar jhapak jaen

dil-o-jigar mein taraazu hon barchhiyan sari

kabhi gar us ruKH-e-tabinda par ho gard-e-malal

to apni jaan se nahin do jahan se bezari

qadam qadam pe shikast-e-KHayal ka matam

gali gali mein tamannaon ki 'aza-dari

kabhi hujum-e-tamanna mein 'arz-e-haal ke waqt

kisi ghazal-e-hirasan ki tez raftari

kisi sitara-e-tanha ka irti'ash-e-KHafi

kisi alaw mein sahmi hui si chingari

hawa ke ruKH pe kisi baadban ki larzish

kisi chakor ki raaton mein girya-o-zari

lab-e-sawal pe ThiTka hua koi maqsad

dayar-e-ghair mein ek ajnabi ki dushwari

ye ghunchagi ka safar tha shaguftagi ki taraf

ki jaise KHwab ki karwaT mein 'azm-e-bedari