حیات جاوداں

ہے جن میں ذوق آزادی وہ زندانوں میں رہتے ہیں

وہی بستی بساتے ہیں جو ویرانوں میں رہتے ہیں

سکوں مقصود ہے جن کو انہیں جینا نہیں آتا

شعور زندگی جن میں ہے طوفانوں میں رہتے ہیں

مٹا کر اپنی ہستی درس دے جاتے ہیں عالم کو

شہیدان وفا کے ذکر افسانوں میں رہتے ہیں

طبیعت کس قدر آزاد ہے ان مرنے والوں کی

کہ جن کی خاک کے ذرے بیابانوں میں رہتے ہیں

حیات جاوداں ملتی ہے ہستی کے مٹانے سے

مسرت ان کا حصہ ہے جو غم خانوں میں رہتے ہیں

جو سوز عشق رکھتے ہیں لگی رہتی ہے لو ان کو

تجلی ڈھونڈنے والے ہی پروانوں میں رہتے ہیں

جسارت ذوق نظارہ کی پیدا کر نگاہوں میں

نمود حسن کے انوار پیمانوں میں رہتے ہیں

وہ ہم مشرب وہ ہم صحبت جنہیں اپنا سمجھتے تھے

مثال سبزۂ بیگانہ بیگانوں میں رہتے ہیں

قفس کا در بنا دیتے ہیں رشک باب آزادی

جو اہل ہوش ہیں تکمیلؔ زندانوں میں رہتے ہیں