جب تم یاد آتی ہو

نہ جانے کتنی تصویریں ابھرتی ہیں تصور میں

مرے نغمات جب بھی زیر لب تم گنگناتی ہو

کوئی بادل کا ٹکڑا چاند کو چھو کر گزرتا ہے

تو لگتا ہے کہ تم آنچل میں اپنا منہ چھپاتی ہو

چمن میں خار سے دامن تمہارا جب الجھتا ہے

نہ جانے اس گھڑی بے ساختہ کیوں مسکراتی ہو

بکھر جاتی ہیں شانوں پر گھنی زلفیں ہواؤں سے

تو اس دم اک نئے انداز سے تم سر جھکاتی ہو

مری تصویر سے کیوں والہانہ پیار ہے تم کو

بتاؤ کیوں مری تصویر سینے سے لگاتی ہو

ہزاروں دیپ جل اٹھتے ہیں یادوں کی منڈیروں پر

تصور کے شبستانوں میں جب تم مسکراتی ہو