خدا حافظ

بہت مدت تمہیں ڈھونڈا تھا صحراؤں میں ہم نے گرد ہونے تک

اگر تم پوچھ ہی لیتے مرے چہرے سے ساری ہجرتوں کی دھول ہٹ جاتی

تمہارے وصل کی چھاؤں جو ملتی دھوپ چھٹ جاتی

اگر تم چاہتے دو چار دن تو ہم بھی جی لیتے

اگر تم سن ہی لیتے حال دل تو چین مل جاتا

خزاں رت میں کنولؔ آنگن میں کوئی پھول کھل جاتا

سنا ہے کہ دعاؤں سے بدل جاتی ہیں تقدیریں

جسے مانگا دعاؤں میں اگر وہ مجھ کو مل جاتا

چلو کوئی نہیں امید کا دامن نہیں چھوڑو

جہاں سے خواب ٹوٹا تھا وہیں سے نیند کو جوڑو

اسے کہنا مجھے سپنے میں پھر ملنا خدا حافظ

یہ برسوں کا تعلق ترک مت کرنا خدا حافظ

اسے کہنا میں اپنے ہونٹ سی کر پھر ملوں گی ہاں

اسے کہنا میں سارے اشک پی کر پھر ملوں گی ہاں