man ka haq

sochtā huuñ apnī maañ kā haq adā kaise karūñ

merī izzat merī azmat kā sabab hai merī maañ

merī ne.amat merī daulat hai vahī ik mehrbāñ

bā.is-e-rahmat hai vo mere liye jannat-nishāñ

kyoñ na phir jī jaan se us zaat kī ḳhidmat karūñ

merī paidā.ish pe taklīfeñ uThā.īñ be-shumār

maiñ huā bhūkā to duudh apnā pilāyā baar baar

mujh ko siine se lagā kar hī use miltā qarār

vo sarāpā māmtā hai aur us ko kyā kahūñ

din ko din us ne na samjhā aur na samjhā shab ko shab

merī bīmārī meñ us kā haal ho jaatā ajab

vo duā kar ke davā kar ke bhī Dartī be-sabab

chhīn letī merī bīmārī ġharaz sabr-o-sukūñ

maiñ sharārat bhī agar kartā to vo kartī thī pyaar

maiñ satātā bhī to vo kartī thī jaañ mujh par nisār

al-ġharaz thī mere dam se ziist us kī pur-bahār

us kī ulfat us kī shafqat kā bayāñ maiñ kyā karūñ

sāya-e-shafqat meñ us ke ho gayā ab maiñ baḌā

ab samajh saktā huuñ apne haq meñ achchhā aur burā

jāntā huuñ ḳhuub maiñ farmāñ rasūlullāh kā

maiñ sivā.e kufr ke har hukm us kā maan luuñ

ai ḳhudā-e-do-jahāñ ai mālik-e-roz-e-jazā

haq adā kartā rahūñ māñ-bāp kā ahbāb kā

dūsroñ ko bhī mirī jaisī sa.ādat kar atā

maiñ ki 'sāhil' garche terā banda-e-nāchīz huuñ

sochtā huuñ apnī maañ kā haq adā kaise karūñ

sochta hun apni man ka haq ada kaise karun

meri izzat meri azmat ka sabab hai meri man

meri neamat meri daulat hai wahi ek mehrban

bais-e-rahmat hai wo mere liye jannat-nishan

kyon na phir ji jaan se us zat ki KHidmat karun

meri paidaish pe taklifen uThain be-shumar

main hua bhuka to dudh apna pilaya bar bar

mujh ko sine se laga kar hi use milta qarar

wo sarapa mamta hai aur us ko kya kahun

din ko din us ne na samjha aur na samjha shab ko shab

meri bimari mein us ka haal ho jata ajab

wo dua kar ke dawa kar ke bhi Darti be-sabab

chhin leti meri bimari gharaz sabr-o-sukun

main shararat bhi agar karta to wo karti thi pyar

main satata bhi to wo karti thi jaan mujh par nisar

al-gharaz thi mere dam se zist us ki pur-bahaar

us ki ulfat us ki shafqat ka bayan main kya karun

saya-e-shafqat mein us ke ho gaya ab main baDa

ab samajh sakta hun apne haq mein achchha aur bura

jaanta hun KHub main farman rasulullah ka

main siwae kufr ke har hukm us ka man lun

ai KHuda-e-do-jahan ai malik-e-roz-e-jaza

haq ada karta rahun man-bap ka ahbab ka

dusron ko bhi meri jaisi saadat kar ata

main ki 'sahil' garche tera banda-e-nachiz hun

sochta hun apni man ka haq ada kaise karun