مٹی کا گیت

مٹی کے سب رنگ انوکھے سب دیوانے مٹی کے

مٹی کے سب کھیل کھلاڑی نئے پرانے مٹی کے

مٹی کی یہ سندر کایا مٹی کی ہی ساری مایا

کنکر پتھر سونا چاندی سولہ آنے مٹی کے

مٹی کے سب چہرے مہرے مٹی کے سب ننگے پاؤں

مٹی کی یہ زلفیں گھنیری سب کے شانے مٹی کے

مٹی کی ننھی سی کیاری مٹی کی مہکی پھلواری

مٹی کے یہ پھول یہ کلیاں سب کے دہانے مٹی کے

مٹی کے سب کھیت ہمارے مٹی کی پگڈنڈی بھی

مٹی کے ہریالے پودے دانے دانے مٹی کے

مٹی کے سب پنگھٹ اپنے مٹی کی سب سکھیاں

مٹی کے چمکیلے گگرے کون یہ جانے مٹی کے

مٹی کی ماں بہنیں اپنی مٹی کے ہیں بچے بالے

جھولا جھولیں سب مٹی کا سب کے ترانے مٹی کے

مٹی کی سی موہنی صورت مٹی کی یہ اپنی گڑیا

مٹی کے سب دلہن دولھا تانے بانے مٹی کے

مٹی کے سب دادی دادا مٹی کے سب نانی نانا

مٹی کے سب آنکھوں والے اندھے کانے سب مٹی کے

مٹی کے سب محل دو محلے مٹی کی چھوٹی سی کٹیا

مٹی کے سب یہ دیے یہ شمعیں سب پروانے مٹی کے

مٹی کی سب گلیاں اپنی مٹی کے سب گاؤں ہمارے

مٹی کے سب شہر بسے ہیں سب ویرانے مٹی کے

مٹی کے سب ساقی و دل بر مٹی کے سب شیشہ و ساغر

مٹی کے سب جام و سبو ہیں سب پیمانے مٹی کے

مٹی کے سب دیوتا دیوی مٹی کے سب گرجا مسجد

کیا سیتا کیا کالی ماتا سب افسانے مٹی کے

مٹی کی میٹھی سی بنسی مٹی کی چنچل رادھا

مٹی سے کرشن کنہیا سب کے گانے مٹی کے

مٹی کا بازار لگا ہے کورے کورے سے برتن

کس کی صراحی کس کا پیالہ سب پیمانے مٹی کے

مٹی کے چولھے پر ناچے سوندھی روٹی مٹی کی

جو کچھ چکی چاک‌ میں پیسے دانے دانے مٹی کے

مٹی کی خوشبو میں بسا ہے مٹی کا یہ ذرہ ذرہ

مٹی کو مٹی ہی پکارے حیلے بہانے مٹی کے

جھن جھن جھن جھن جھن جھن بجتی کوڑی مٹی کی

کھن کھن کھن کھن گیت سناتے آنے آنے مٹی کے

تاک دھنا دھن تاک دھنا دھن بولا طبلہ مٹی کا

ناچو ناچو ناچو ناچو سب رقصانے مٹی کے

دھما دھما دھو دھما دھما دھو دھمکا مٹی کا تانڈو

اس کے پیچھے یاہو یاہو سب مستانے مٹی کے

دھڑ دھڑ دھڑ دھڑ دھڑک رہی ہے ہر ہر چھاتی مٹی کی

سرسر سرسر سرک رہے ہیں سارے شانے مٹی کے

مٹی مٹی مٹی باجے باجے کوچ کا نقارا

گھر چل گھر چل گھر چل گھر چل او من مانے مٹی کے

مٹی مٹی مٹی مٹی مٹی لوری گاتی ہے

سو جا سو جا سو جا سو جا او دیوانے مٹی کے

مٹی کی چادر میں چھپیں گے قبر بنے گی مٹی کی

سب مٹی میں مل جائیں گے ختم فسانے مٹی کے

ختم فسانے مٹی کے