موڑ

نکلنا دفتروں سے اور گھر کو لوٹ جانا

یہی تو زندگی ہے آج سب کی

وہ کوئی دوست یا محبوب کوئی ہو

سبھی کو جلد منزل پر پہنچنے کی پڑی ہے

وہ منزل کیا ہے ان کے گھر

جو ہیں اک گھونسلے جیسے

یہ چڑیوں کی طرح اک ساتھ دفتر سے نکلتے ہیں

جو ایک اک کر کے ایک اک موڑ پر کم ہوتے جاتے ہیں

اور آخر میں یہی آوارگی بچتی ہے میرے ساتھ ہے جو

تمہیں سمجھا رہا ہوں بس

مرے غصے کو سمجھو تم

مگر غصہ نہیں واجب

کہ ممکن ہی نہیں دنیا ہم آوارہ لوگوں کا کوئی بھی ساتھ دے پائے

تمہارا ساتھ بھی اک موڑ تک ہے