نغمۂ مجسم

مہتاب بدن گلاب صورت

سر تا بہ قدم جمال فطرت

ہونٹوں پر موگرے کی کیاری

رفتار لچکتی غم گساری

چہرے پہ نیاگرا برستا

آواز میں جل ترنگ بجتا

نغموں سے بھرا ہوا پیانو

ہے سامنے اس کے جو دو زانو

اس کی مخروط انگلیوں میں

وہ لوچ ہے وہ گداز و خم ہے

چھونا نہیں پڑتا تار کوئی

بس لمس کی بات سوچتے ہیں

رگ رگ تار جاں کی مانند

بجنے لگتی ہے سر خوشی میں

خوں نغمگیوں کے زیر و بم کا

باجے کے بدن میں دوڑتا ہے

جی اٹھتے ہیں جن کے سننے والے

عیسیٰ نفسی کی داد دیتے