نوحہ
سیہ رات میں ٹمٹماتے ستاروں کے نیچے
خروشاں سمندر کی موجیں تجھے ڈھونڈھتی ہیں
خروشاں ہوا کی صداؤں میں تیری صدا ہے
مرا دل تجھے ڈھونڈھتا ہے
سیہ رات اشکوں کی شبنم میں سوئی ہوئی ہے
ہر اک پل ہر اک لمحہ ماضی کا
زندہ ہے موجود میں جاگتا ہے
مگر تیرا پیکر
تہ خاک اندھیروں کے مامن میں سویا ہوا ہے
مرا دل کہ ماتم گر رفتگاں ہے
تجھے ڈھونڈھتا ہے
میں آسودۂ ریگ خاموش
اس رات کی جلتی آنکھوں کو دیکھوں
سیہ رات میں ٹمٹماتے ہوئے
ان ستاروں سے پوچھوں
خروشاں سمندر میں ڈوبا ہوا چاند
کسی اجنبی سر زمیں پر تبسم کناں ہے
نقوش کف پا کی منزل کہاں ہے؟
یم زندگی سیل در سیل بہتا ہوا
ایک لمحے کو رک کر پلٹ کر نہ دیکھے
سیہ رات میں ٹمٹماتے ستاروں کے نیچے
فقط ایک شب بے صدا جاگتی ہے
شب بے صدا پوچھتی ہے
بپھرتی ہوئی موج دریا کدھر سے چلی تھی؟
کدھر کو چلی ہے؟
مرا دل کہ ماتم گر رفتگاں ہے
کسے ڈھونڈھتا ہے
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
