پاسورڈ

زمانہ ایک وہ بھی تھا

کہ میرے راستے میں آ بھی جاتی گر کوئی مشکل

تو تیرا نام ہی میرے لیے مشکل کشا تھا

جیسے کوئی قفل ابجد

جس سے کھل جاتے تھے

سارے بند دروازے

وہ دروازے

کہ جن سے ہو کے جاتے تھے

مری دنیا کے سب رستے

مسرت کی سبھی راہیں

محبت کی گزر گاہیں

زمانہ ایک یہ بھی ہے

ہمارے بیچ کتنا فاصلہ ہے

اور ہمارے راستے کتنے الگ ہیں

پھر بھی میری ورچول دنیا

کے سارے بند دروازے

ترے ہی نام کی چابی سے کھلتے ہیں

ترے ہی نام پر رکھے ہوئے ہیں میں نے سارے پاسورڈ اپنے