سورج گرہن

ہو رہا ہے یہ نظام دہر میں کیا انقلاب

آج مشرق ہی میں ڈوبا جا رہا ہے آفتاب

چھا گئی افسردگی ایسی در و دیوار پر

یورش ظلمت ہو جیسے مطلع انوار پر

روشنی کم ہو چلی نظارے گھبرانے لگے

آج دن میں خلق کو تارے نظر آنے لگے

ڈوبا جاتا ہے نظر کے سامنے گردوں کا دل

آرزو میں بے سر و پا ہیں نگاہیں مضمحل

گھلتا جاتا ہے سحر کے وقت قرص آفتاب

بے ثباتی کا معمہ ہو رہا ہے بے نقاب

اب نظام چرخ کج رفتار برہم ہو گیا

یک بیک دنیا کا کاروبار مدھم ہو گیا

امتحاں کا وقت ہے سورج گہن میں آ گیا

دونوں عالم کی فضاؤں پر دھندلکا چھا گیا

دست فطرت نے نواز نغمۂ خاموش ہے

حیرتوں کا نقش لوح دل سے ہم آغوش ہے

زندگی میں ایک ایسا دور آتا ہے ضرور

بار غم سے جب سکوں کا ٹوٹ جاتا ہے غرور

مشکلیں زیور ہیں حسن زندگانی کے لئے

رنج و غم غازہ ہیں روئے شادمانی کے لئے

وقت کی گرمی گلا دیتی ہے لوہا آس کا

آرزو کے خون سے رنگیں ہے پیکر یاس کا

ساز اطمینان سے آتی ہے ماتم کی صدا

ایک رخ پر رہ نہیں سکتی زمانے کی ہوا

وقت کی تلوار کا ہر زخم کھانا چاہئے

مرد کو دشواریوں میں مسکرانا چاہئے