دیکھ رہا تھا جاتے جاتے حسرت سے

سوچ رہا ہوگا میں اس کو روکوں گا

وہ سو رہا ہے خدا دور آسمانوں میں

فرشتے لوریاں گاتے ہیں اس کے کانوں میں

میں تیری چاہ میں جھوٹا ہوس میں سچا ہوں

برا سمجھ لے مگر دوسروں سے اچھا ہوں

آواز دے رہا ہے اکیلا خدا مجھے

میں اس کو سن رہا ہوں ہواؤں کے کان سے

میں بھی تالاب کا ٹھہرا ہوا پانی تھا کبھی

ایک پتھر نے رواں دھار کیا ہے مجھ کو

پان کے ٹھیلے ہوٹل لوگوں کا جمگھٹ

اپنے تنہا ہونے کا احساس بھی کیا

وہ اجنبی تری بانہوں میں جو رہا شب بھر

کسے خبر کہ وہ دن بھر کہاں رہا ہوگا

پھٹے پرانے بدن سے کسے خرید سکوں

سجے ہیں کانچ کے پیکر بڑی دکانوں میں

پتھر نے پکارا تھا میں آواز کی دھن میں

موجوں کی طرح چاروں طرف پھیل گیا ہوں

اس نے چلتے چلتے لفظوں کا زہراب

میرے جذبوں کی پیالی میں ڈال دیا

اپنی ہی ذات کے صحرا میں سلگتے ہوئے لوگ

اپنی پرچھائیں سے ٹکرائے ہیولوں سے ملے

کچھ مدھر تانیں فضا میں تھرتھرا کر رہ گئیں

دھان کے کھیتوں میں چنچل پنچھیوں کا شور تھا

پھر اک نئے سفر پہ چلا ہوں مکان سے

کوئی پکارتا ہے مجھے آسمان سے