ہم فقیروں کا پیرہن ہے دھوپ

اور یہ رات اپنی چادر ہے

ترے ہاتھوں میں ہے تری قسمت

تری عزت ترے ہی کام سے ہے

میں بارشوں میں بہت بھیگتا رہا عابدؔ

سلگتی دھوپ میں اک چھت بہت ضروری ہے

اب قفس اور گلستاں میں کوئی فرق نہیں

ہم کو خوشبو کی طلب ہے یہ صبا جانتی ہے

اس اعتبار پہ کاٹی ہے ہم نے عمر عزیز

سحر کا وقت اجالے بھی ساتھ لائے گا

سب اپنے اپنے طریقے سے بھیک مانگتے ہیں

کوئی بنام محبت کوئی بہ جامۂ عشق

کوئی منظر بھی نہیں اچھا لگا

اب کے آنکھوں میں ہے ویرانی بہت

یزید وقت نے اب کے لگائی ہے قدغن

کہ بھول کر بھی نہ گائے کوئی ترانۂ عشق

سر پر گرے مکان کا ملبہ ہی رکھ لیا

دنیا کے قیمتی سر و سامان سے گئے

ہم کسی سلطاں کے تابع نہیں عابدؔ ودود

ہم وہ کہتے ہیں جو اپنے دل پہ ہے گزری ہوئی

شہر یہ سایوں کا ہے اس میں بنی آدم کہاں

اب کسی صورت یہاں انسان ہونا چاہئے

مگر یہ تیرگی جانے کا نام لیتی نہیں

میں نور بانٹتا سوز نہاں کی زد میں ہوں