chīḳh uThtā hai daf.atan kirdār

jab koī shaḳhs bad-gumāñ ho jaa.e

chiKH uThta hai dafatan kirdar

jab koi shaKHs bad-guman ho jae

fāsle ye simaT nahīñ sakte

ab parāyoñ meñ kar shumār mujhe

fasle ye simaT nahin sakte

ab parayon mein kar shumar mujhe

biktā rahtā sar-e-bāzār ka.ī qistoñ meñ

shukr hai mere ḳhudā ne mujhe shohrat nahīñ dī

bikta rahta sar-e-bazar kai qiston mein

shukr hai mere KHuda ne mujhe shohrat nahin di

merī kam-goī pe jo tanz kiyā karte haiñ

merī kam-goī ke asbāb se nā-vāqif haiñ

meri kam-goi pe jo tanz kiya karte hain

meri kam-goi ke asbab se na-waqif hain

ye alag baat ki tajdīd-e-ta.alluq na huā

par use bhūlnā chāhūñ to zamāne lag jaa.eñ

ye alag baat ki tajdid-e-talluq na hua

par use bhulna chahun to zamane lag jaen

kisī kī shaḳhsiyat majrūh kar dī

zamāne bhar meñ shohrat ho rahī hai

kisi ki shaKHsiyat majruh kar di

zamane bhar mein shohrat ho rahi hai

bahut ba.iid na thā mas.aloñ kā hal honā

anā ke paañv se zanjīr ham haTā na sake

bahut baid na tha masalon ka hal hona

ana ke panw se zanjir hum haTa na sake

tark-e-ulfat ke ba.ad bhī 'ashfāq'

terā rahtā hai intizār mujhe

tark-e-ulfat ke baad bhi 'ashfaq'

tera rahta hai intizar mujhe

ajab Thahrāo paidā ho rahā hai roz o shab meñ

mirī vahshat koī taaza aziyyat chāhtī hai

ajab Thahrao paida ho raha hai roz o shab mein

meri wahshat koi taza aziyyat chahti hai

ab kisī ḳhvāb kī ta.abīr nahīñ chāhtā maiñ

koī sūrat pas-e-tasvīr nahīñ chāhtā maiñ

ab kisi KHwab ki tabir nahin chahta main

koi surat pas-e-taswir nahin chahta main

lagtā hai ki is dil meñ koī qaid hai 'ashfāq'

rone kī sadā aatī hai yādoñ ke khañDar se

lagta hai ki is dil mein koi qaid hai 'ashfaq'

rone ki sada aati hai yaadon ke khanDar se