اک بند ہو گیا ہے تو کھولیں گے باب اور

ابھریں گے اپنی رات سے سو آفتاب اور

ایک مدت سے دھدھکتا رہا میرا یہ ذہن

تب کہیں جا کے فروزاں ہوئے لفظوں کے چراغ

جب بھی ملتے ہیں تو جینے کی دعا دیتے ہیں

جانے کس بات کی وہ ہم کو سزا دیتے ہیں

حادثے جان تو لیتے ہیں مگر سچ یہ ہے

حادثے ہی ہمیں جینا بھی سکھا دیتے ہیں

شاید زباں پہ قرض تھا ہم نے چکا دیا

خاموش ہو گئے ہیں تجھے ہم پکار کے

ایسے سلگ اٹھا تری یادوں سے دل مرا

جیسے دھدھک اٹھیں کہیں جنگل چنار کے

جمہوریت کی لاش پہ طاقت ہے خندہ زن

اس برہنہ نظام میں ہر آدمی کی خیر

ہر آدمی کے قد سے اس کی قبا بڑی ہے

سورج پہن کے نکلے دھندلے چراغ یارو

کس نے بیچا نہیں سخن اپنا

کون بازار تک نہیں پہنچا

چارہ گر سب کے پاس جاتا تھا

صرف بیمار تک نہیں پہنچا

فن جو معیار تک نہیں پہنچا

اپنے شہکار تک نہیں پہنچا

ہر خدا جنتوں میں ہے محدود

کوئی سنسار تک نہیں پہنچا

یوں عبث کسی کو سدا نہ دو دل زار کو یہ بتا بھی دو

کبھی اب نہ آئیں گے لوٹ کر وہ جو ایک بار چلے گئے

پیڑ کو اپنا ہی سایہ نہیں ملتا لوگو

فصل اپنی کبھی پاتے نہیں بونے والے

وہ ریت پر اک نشان جیسا تھا موم کے اک مکان جیسا

بڑا سنبھل کر چھوا تھا میں نے پہ ایک پل میں بکھر گیا وہ

کاش لوٹیں مرے پاپا بھی کھلونے لے کر

کاش پھر سے مرے ہاتھوں میں خزانہ آئے