اپنے احساس کی شدت کو بجھانے کے لئے

میں نئی طرز کے خوش فکر رسالے مانگوں

ہر ایک حرف سے جینے کا فن نمایاں ہو

کچھ اس طرح کی عبارت نصاب میں لکھیے

زندگی کے بہت قریب نہ جا

فاصلہ کچھ تو اپنے دھیان میں رکھ

فساد روکنے کم ظرف لوگ پہنچے ہیں

گھروں میں رہ گئے روشن ضمیر جتنے تھے

انگلیوں کے ہنر سے اے اکملؔ

شکل پاتی ہے چاک پر مٹی

میرا سایہ بھی بڑھ گیا مجھ سے

اس سلیقہ سے گھٹ گیا ہوں میں

آرزو ٹیس کرب تنہائی

خود میں کتنا سمٹ گیا ہوں میں

اکملؔ آج کا انساں کتنا بے تحمل ہے

دل میں کچھ خلش ابھری اور داغ دی سازش

نئی تحقیق نے قطروں سے نکالے دریا

ہم نے دیکھا ہے کہ ذروں سے زمانے نکلے

ذہن میں اجنبی سمتوں کے ہیں پیکر لیکن

دل کے آئینے میں سب عکس پرانے نکلے