یہ پوچھ آ کے کون نصیبوں جیا ہے دل

مت دیکھ یہ کہ کون ستارہ ہے بخت میں

بدن ملبوس میں شعلہ سا اک لرزاں قرین جاں

دل خاشاک بھی شعلہ ہوا جلتا رہا میں بھی

بارہا تو نے خواب دکھلائے

بارہا ہم نے کر لیا ہے یقیں

جیسے پانی پہ نقش ہو کوئی

رونقیں سب عدم ثبات رہیں

رکھوں کہاں پہ پاؤں بڑھاؤں کدھر قدم

رخش خیال آج ہے بے اختیار پھر

عشق اک ایسی حویلی ہے کہ جس سے باہر

کوئی دروازہ کھلے اور نہ دریچہ نکلے

حیرت سے دیکھتا ہوا چہرہ کیا مجھے

صحرا کیا کبھی کبھی دریا کیا مجھے

کچھ تو عنایتیں ہیں مرے کارساز کی

اور کچھ مرے مزاج نے تنہا کیا مجھے

ہزار کارواں یوں تو ہیں میرے ساتھ مگر

جو میرے نام ہے وہ قافلہ کب آئے گا

جیوں گا میں تری سانسوں میں جب تک

خود اپنی سانس میں زندہ رہوں گا

میسر سے زیادہ چاہتا ہے

سمندر جیسے دریا چاہتا ہے

ہوا بھی چاہئے اور روشنی بھی

ہر اک حجرہ دریچہ چاہتا ہے

یہ کون سی جگہ ہے یہ بستی ہے کون سی

کوئی بھی اس جہان میں تیرے سوا نہیں

اندھا سفر ہے زیست کسے چھوڑ دے کہاں

الجھا ہوا سا خواب ہے تعبیر کیا کریں